नातिवज्रयात ईलोहं ज्ञानज्योति सिरपाः
'ईलोहं' मचालय्पौया झिंछदँ बुन्हिया लसताय् थीथी व्यक्तिपिंत हना व रञ्जना लिपिया लय्पौ 'लुँ आखः' विमोचन जुल। शुक्रवाः छगू ज्याझ्वःया दथुइ थ्व हना व विमोचन जूगु खः। ज्याझ्वलय् मू पाहां नेपालभाषा मंकाः खलःया नायः पद्मरत्न तुलाधरं थुगुसीया ईलोहं ज्ञानज्योति सिरपाः बाल साहित्यकार नापं कवि नातिबज्र बज्राचार्ययात लःल्हानादिल। अथे हे ईलोहं एल्भिस सिरपाः च्वमि विजयरत्न असंबरेयात लःल्हात ।
उकथं हे 'नःलि' साहित्यिक पत्रिकाय् पिहां वःगु च्वसु मध्येयात बीगु 'नःलि प्रधान सिरपा' थुगुसी साहित्यकार तिलक प्रकाश कायस्थयात लःल्हात। ईलोहं पत्रिकाय् पिहां वःगु च्वसुयात बीगु 'ईलोहं साय्मि सिरपाः महांकाल मा.बि.या यूरिका शाक्य, रुबिना शाक्य, रकृति शाक्य, रजनी श्रेष्ठ व जगतसुन्दर ब्वनेकुथिया सचेत मानन्धरयात लःल्हाःगु खः ।
उगु हे ज्याझ्वलय् नेपाःया मौलिक आखः रञ्जना लिपिया लय्पौ 'लुँ आखः' नं पितब्वज्या जूगु खः। उकिया सम्पादक भाजु दर्शनवीर शाक्य खः। नापं साहित्यकार भुषणप्रसाद श्रेष्ठया 'हाकनं छक्वः' व 'छता खँ कनेयःसा', भाजु नातिबज्रया 'जि हेरा' व नरेशवीर शाक्यया 'बालकथा भाग-७' प्यंगू सफू नं अन विमोचन जूगु खः ।
ज्याझ्वलय् ईलोहं प्रकाशनयात विज्ञापन बियादीपिं थीथी विज्ञापनदातापिं व सिरपाः दातापिंत नं सुभाय्पौ लःल्हायेगु ज्या नं जूगु खः ।
ज्याझ्वलय् न्ववासें मूपाहां पद्मरत्न तुलाधरं नेपालभाषा ख्यलय् भाषिक आन्दोलनं ततःधंगु उपलब्धि याःगु दःसां नं अझ नं पुनर्जागरणया आवश्यकता जुयाच्वंगु खँ न्ह्यथनादिल। नापं नेपालभाषाया पत्रिकाय् खय् भासं विज्ञापन छापे जुयाच्वंगु खँय् नं कुंखिनादिल ।
सभासद् तिर्थराम डंगोलं मस्तय्गु लागिं ईलोहं प्रकाशनं ज्या यानाच्वंगु धइगु हे कन्हय्या पुस्ता तयार यानाच्वंगु खः धयादिल। मेम्ह पाहां चेम्बर अफ कमर्सया नायः सुरेन्द्रवीर मालाकारं नेपालभाषा आन्दोलनयात थौंया ईयात ल्वइ कथं न्ह्याकेमाःगु आवश्यकता बारे कुलादिल।
ईलोहं सम्पादन पुचःया दुजः सुरेश किरणं लसकुस यासें न्ह्याकूगु उगु ज्याझ्वः 'ईलोहं' या प्रधान सम्पादक नरेशवीर शाक्यया सभापतित्वय् जूगु खः ।
