सशस्त्र पुचः नाप बैशाखया निगूगु वाःनिसें हाकनं वार्ता
शान्ति व पुननिर्माणमन्त्री जनार्दन शर्मा प्रभाकरं तराईया सशस्त्र पुचःनाप बैशाखया निगूगु वाः निसें निगूगु चरणया वार्ता न्ह्याकीगु जानकारी बियादीगु दु ।
आन्दोलानरत थीथी सशस्त्र व निशस्त्र पुचःलं सरकारं सम्झौता कार्यान्वयन मयागु धासें आन्दोलनय् कुहांवयेगु ख्याच्वः बियाच्वंगु ईलय् मन्त्रालय् आइतवाः पत्रकार सम्मेलन यानाः वयेकलं सम्झौता कथं छुं माग पूवनेधुंकूगु व छुं कार्यान्वयन चरणय् दुगु धयादिल । वयेकलं सशस्त्र पुचःतनाप न्हापांगु चरणय् जूगु सम्झौता कथं सशस्त्र पुचःया कार्यकर्तातय्त तयातःगु मुद्धा व त्वतेगु प्रक्रिया गृह मन्त्रालयं न्ह्याकेधुंकूगु धासें गम्भीक प्रकृतिया मुद्धाया धासाः छानबीन प्रकृया छुं तहाकःगु धयादिल ।
अथेहे वयेकलं थारु समुदायनाप जूगु सहमति कथं थारुतय् पहिचानया सम्मान याइकथं संविधान संशोधन याइगु धासें सार्वजनिक सेवाय् समावेशीकरण अध्यादेशय् संशोधन यायेधुंकूगु दाबी यानादिल । आन्दोलनया झ्वलय् सहिद जूपिंत राहत बीत अर्थ मन्त्रालयं प्रकृया न्ह्याकेधुंकूगु जानकारी बियादिसें वयेकलं घाःपाः जूपिं सरकारी खर्चय् येँया थीथी अस्पताल् वासः याकाच्वंगु धयादिल ।
वयेकलं मुस्लिम व मेगु आन्दोलनरत समुदायनाप जूगु सहमति नं कार्यान्वयन चरणय् दुगु कनादिल । सरकारं लिपांगु खुशी तराईया सशस्त्र वुच व आन्दोलनरत थीथी समुदायत याना झिगू पुचः नाप सहमति यायेधुंकूगु दु ।
