गोलीं कयेकाः मचा स्याना बिल
येँ (सन्ध्या टाइम्स)/रौतहटय् थौं सुथय् म्हमसिउपिं मनूतय्सं गोलीं कयेकाः न्यादँ दुम्ह छम्ह मचायात स्याना बिउगु दु। रौतहटया मानपुर विसुनपुरवा गाविस वडा नं. १ या बिनोद मुखीयाया न्यादँ दुम्ह काय श्रवणयात गोलीं कयेकाः स्याना बिउगु खः ।
थःगु हे छेँया बरण्डाय् द्यनाच्वंम्ह मचा श्रवणयात थौं सुथय् न्याम्ह खुम्हया ल्याखय् वःपिं हतियारधारी मनूतय्सं गोलीं कयेकाः स्याना बिउगु खः। जँय् गोलीं कःम्ह मचा घटनास्थलय् हे सीगु खः। उगु घटनाय् स्वापू दुगु आशंकाय् रौतहटया इलाका प्रहरी ज्याकू गरुडां छम्हेसित नियन्त्रणय् काःगु दु। नियन्त्रणय् काःम्ह मनूतय् नां व थाय्बाय् प्रहरीं आः तक नं सार्वजनिक याःगु मदुनि। उगु घटनाय् स्वापू दुपिं मनूतय्त मालेगु ज्या तीब्र रुपं न्ह्यानाच्वंगु दु धकाः प्रहरीं धाःगु दु। अथे मचायात हे गोलीं कयेकाः छाय् स्याना बिउगु खः धकाः आः तक नं सीके फुगु मदुनि ।
