कपिलवस्तुवासीं हाकुगु न्हि हनीगु

येँ (सन्ध्या टाइम्स)/कपिलवस्तु घटनाया पीडिततय्सं कंस भदौ ३० गतेयात हाकुगु न्हिया रुपय् हनीगु जूगु दु। २०६४ सालया भदौ ३० गते स्थानीय मोइद खाँया हत्या लिपा जूगु हिंसात्मक घटनाय् कपिलबस्तुया चन्द्रौटा बजारय् १४ म्ह मनू सीगु नापं करोडौं तकाया सम्पत्ति मिं नयाः नष्ट जूगु खः। वहे दिंयात लुमंकाः कंस ३० गते अन हाकुगु ब्यानर प्रदर्शन यायेगु नापं दोषीयात कारवाहीया माग यानाः दबावमुलक सडक संवाद व ल्हाःचिं मुंकेगु अभियान न्ह्याकीगु जूगु दु ।