पोखराय् मानन्धर संघया नीछक्वःगु तःमुँज्या

पोखरा (सन्ध्या टाइम्स)/केन्द्रीय मानन्धर संघया नीछक्वःगु तःमुँज्या ने.सं ११३० गुंलागा ११ कुन्हु पोखरा मानन्धर गुथिया ग्वसालय् क्वचाल ।

के.मा.सं.या सभापति न्हुछे बहादुर मानन्धरया सभापतित्वय् व पोखरा मानन्धर गुथिया अध्यक्ष सुरेशकुमार मानन्धरया प्रमुख आतित्यथ्यताय् जूगु उगु तःमुँज्या संघया सभापति न्हुछेबहादुर मानन्धरं के.मा.सं.या संस्थापक सभापति देवदास मानन्धरया किपाय् खादागा क्वखायेकाः उलेज्या यानादीगु खः ।

उपसभापति रत्ननारायण 'न्हूजवाः' साय्मिं लसकुस न्वचु बिसें सुन्दर शहर पोखराय् तःमुँज्या याये दुगुलिं लसता प्वंकादिल ।

सचिव प्रेम साय्मिं वार्षिक प्रतिवेदन व कोषाध्यक्ष बद्रिनारायण मानन्धरं आर्थिक प्रतिवेदन न्ह्यब्वयादिल।
तथ्यांक उपसमितिया संयोजक देवदास मानन्धरं तयार यानादीगु २३,००० (नीस्वद्वः) मानन्धरतय्गु नां दुथ्याःगु 'मानन्धर धलः पौ' सफू थीथी त्वाः, खलः, पुचः, गुथिया प्रतिनिधिपिंत लःल्हायेगु ज्या जुल ।

अथे हे भवन निर्माण उपसमितिया संयोजक प्रकाशबहादुर मानन्धरं मानन्धर छेँ धस्वाकेगु योजनाय् वयाच्वंगु थीथी समस्यायात कयाः नुगःखँ प्वंकादिल। थुकिया नापं कार्यसमितिइ प्वनाच्वंगु छगू पदय् दैसाः ल्याय्म्ह पुचःया सन्देश मानन्धरयात मनोनित यात ।

१९ गते शुक्रबाः कुन्हु तःमुँज्या सुरु जुइ न्ह्यः केन्द्रीय मानन्धर संघ व पोखरा मानन्धर गुथिया करिब ३५० म्ह प्रतिनिधि व पर्यवेक्षकतय्सं ब्वति काःगु र्‍यालीं पृथ्वीचोकं (लखन चोक) निसें नदीपुर शाक्य समाजया ज्याकू तक देय् चाःहिउगु खःसा उकी स्यांजा मानन्धर गुथिया लाखे व झ्यालिंचा प्याखं नं न्ह्यब्वःगु खः ।