सुनसरीइ निषेधाज्ञाया अवज्ञा
स्थानीय प्रशासनं तःगु निषेधाज्ञाया अवज्ञा यासें सुनसरीया जुद्धगंज व नहरचौकय् आन्दोलनरत सप्तकाशी विस्थापिततय्सं आइतवाः प्रदर्शन याःगु दु । राजमार्ग क्षेत्रय् न्ह्यानाच्वंगु हड्ताल व अवरोध पनेत सुनसरी प्रशासनं शनिवाः सनिलय्य न्ह्यता ईलं निसें सुनसरीया लौकही निसें पश्चिम कोशी ब्यारेजतकया राजमार्गय् बन्द, हड्ताल, अवरोध व प्रदर्शन यायेमदइ कथं निशेधाज्ञा जारी याःगु खः । तर आइतवाः नं उगु सतक क्षेत्रय् सवारी चलेजुइ मफुत ।
प्रशासनं निषेधाज्ञाया ईलय् शनिवाः जुद्धगंज चौकय् प्यंगू राउण्ड हवाइ फायर व छुं सेल अश्रुग्याँस प्रहार यानाः दिकातःगु आपालं सवारीयात आन्दोलन प्रभावित क्षेत्रं पिनेयंकूगु खः । बहनीनिसें चान्हे तकं यातायात संचालन याकूसां आइतवाः सुथंनिसें काशी पीडितय् अवरोधया कारण यातायात संचालन जुइफुगु मदुनी । उच्चस्तरीय कार्यदलया प्रतिवेदन कार्यान्वयन यायेमाःगु लगायतया न्ह्यगू सूत्रिय माग यासें आन्दोलित कोशी विस्थापिततय्सं वंगु चैत २७ गते निसें सुनसरी लौकही पश्चिमया यातायात अवरुद्ध यानावयाच्वंगु खः ।
अथेहे आन्दोलनरत सप्तकोशी विस्थापिततय्सं सुनसरी सदरमुकाम इनरुवाय् प्रदर्शन याःगु दु । खशीबालं प्रभावित हरिपु श्रीपुर पश्चिम कुशहा व लौकहीं वःपिं विस्थापिततय्सं स्थानीय प्रशासनं दमन याःगु धासें नारावाजी व प्रदर्शन याःगु खः ।
स्थानीय भगवती माविइ याःगु विरोध सभाय् विस्थापिततय्सं वर्तमान सरकारं थःपिनि माग पूवंकेगु पलेसा दमन याःगु धाःगु दु ।
