राष्ट्रसंघ अन्यौलय्
अनमिनया म्याद थपया विषयलय् सरकार व एकीकृत नेकपा (माओवादी) दथुइ खँ ज्यनेमफयाः संयुक्त राष्ट्रसंघ अन्यौलय् लाःगु दु ।
अनमिनया कार्यादेश व समयावधिइ माओवादी व सरकार दथुइ एकमत जुइमफयाः म्याद थपया विषयलय् मंकाः पौ छ्वयेत लिबाःगु दु । अनमिनया समयावधि थ्वहे भदौ ३० गते क्वःचाइगु जूगुलिं अमेरिकाया न्यूयोर्कय् न्ह्यानाच्वंगु संयुक्त राष्ट्रसंघीय सुरक्षा परिषद् बैठक मंकाः पौया आशय् च्वनाच्वंगु दु । सरकार व माओवादीया मंकाः पौ वयेधुंकाः सुरक्षा परिषद्य् सहलह यानाः अनमिनया कार्यादेश क्वःछिना समयावधि थप याइ ।
सरकारं नेपाली सेनाया अनुगमन यायेमदइगु आशयलिसे अनमिनया म्याद प्यला थप यायेत सुरक्षा परिषद्य् पौ छ्वःगु खःसा माओवादीं सरकारी पौ छगू पक्षीय जूगु धासें पुलांगु हे कार्यादेशकथं अनमिनया म्याद खुला थप यायेत इनापलिसे ब्यागलं पौ छ्वःगु खः । माओवादीया नेतातय्सं पुलांगु हे कार्यादेशकथं अनमिनया म्याद खुला थप यायेगु सहमति जूगु धाःगु दुसा सरकारी पक्षं माओवादीलिसे थज्याःगु छु नं सहमति मजूगु धाःगु दु ।
