माओवादीपाखें दुस्प्रचारया खण्डन
एकीकृत नेकपा (माओवादीं) येँ पाखें थौं पिकाःगु छगू न्हिपतिइ 'सभासद् न्यायेत धेवा' फ्वनागु स्वीकार छ्यंग्वःया बुखँय् पार्टी व नेतृत्वया चरित्र हत्या यायेगु नियतं तथ्ययात तोडमोड यानाः प्रवाहित याःगु धासें उकिया खण्डन याःगु दु ।
माओवादीया प्रवक्ता दीनानाथ शर्मां थौं सञ्चार माध्यमलिसे खँल्हाबल्हा यानादिसें माओवादीया सु नं नेताया चीनियाँ अधिकारी, पार्टी प्रतिनिधि व नागरिक सुंलिसे नं थुगु कथंया टेलिफोन वार्ता मजूगु स्पष्ट यानादिल । पार्टीयात बदनाम व व्यक्तिया चरित्रहत्या यायेगु अभिप्रायलिसे प्रधानमन्त्री निर्वाचनया न्ह्यःने जूगु थंज्याःगु कथंया दुश्प्रचार प्रायोजित व षड्यन्त्रपूर्ण हर्कत जूगु वय्कलं धयादिल ।
चीनयात विवादय् सालेत षड्यन्त्रपूर्ण ढङ्गं जूगु प्रचारबाजीया माओवादी पार्टीं खण्डन व भ्रर्त्सना यायेधुंकाः नं छक्वःपतिकं भ्रमपूर्ण बुखँ प्रवाह याःगुप्रति शर्मां अजू चाःगु धयादिल । वय्कलं छगू ला कृत्रिम अडियो टेप वितरण याःगु व निगूगु राष्ट्रिय सुरक्षाया दुनेया तहतक विदेशी खुफिया थ्यंगु देय्या स्वाधिनता व राष्ट्रिय सुरक्षाया निंतिं च्यूताःया विषय जूगु धयादिल । वय्कलं थ्व राष्ट्रया दकले तःधंगु अपराध जूगु व गोपनियता व मानवअधिकार विरुद्धया अपराध नं जूगु धयादिल ।
सभासद न्यायेत धेबा फ्वंगु धइगु प्रचारबाजी समग्र लोकतन्त्र प्रति हे आक्रमण जूगु धयादिसें प्रवक्ता शर्मां नियोजितरुपं जूगु उगु प्रचारबाजीया निन्दा, भर्त्सना व खण्डन याःगु धयादिल । वय्कलं उगु टेप प्रकरणया छानबिन यायेत व गोपनियता भङ्ग याम्हेसित कारवाही यायेत सरकारलिसे माग नापं यानादिल ।
