चीनयात नेपालय् वैदेशीक हस्तक्षेप अस्वीकार्य
नेपा: भ्रमणय् दुगु चिनियाँ कम्युनिस्ट पार्टीया उच्चस्तरीय प्रतिनिधिमण्डलं नेपा:या आन्तरिक मामिलाय् जुइगु वैदेशीक हस्तक्षेप चीनयात स्वीकार्य मजुइगु स्पष्ट याःगु दु ।
थौं सुथय् राष्ट्रपति डा. रामवरण यादव व प्रधानमन्त्री माधवकुमार नेपालयात व्याग्लं व्याग्लं नापलाना चीनं नेपाःया आन्तरिक मामिलाय् ल्हाः मतयेगु व मेमेपिंसं तकं ल्हाः तइगु थःपिंत स्वीकार्य मजुइगु खँ चिनियाँ पुचलं धाःगु दु ।
राष्ट्रपति यादवनाप जूगु खँल्हाबंलाय् चिनियाँ पुचलं नेपाःया शान्ति प्रक्रियाय् थःपिनिगु समर्थन दुगु खँ धाःगु खः । उगु इलय् राष्ट्रपति यादवं नेपाःया दक्वं ख्यलय् चीनया ग्वहालि आवश्यक जूगु धयादिल ।
अथेहे थौं हे सिंहदरवारय् प्रधानमन्त्री माधवकुमार नेपाल नाप जूगु खँल्हाबंला चिनियाँ पुचलं नेपाःया शान्ति प्रक्रिया सहमतिया माध्यमं लिच्वलय् थ्यंकेमाःगु सुझाव ब्यूगु खः । पुचलं प्रधानमन्त्री निर्वाचनय् खनेदुगु अन्यौल, शान्ति प्रक्रिया व संविधान निर्माण बारे नं सहलह याःगु खः ।
चिनियाँ पुचलं नेपालपाखें चीन विरोधी गतिविधि जुइगु झ्वः न्ह्याःगु खँ धाःगु खःसा प्रधानमन्त्री नेपालं एक चीन नीतिप्रति नेपाल प्रतिवद्ध जूगु धयादिल । उगु इलय् चीनं नेपालय् जलविद्युत व सतक विस्तार योजनाय् लगानी याकेत नुगः ब्यूगु दु ।
थौं हे चिनियाँ प्रतिनिधिमण्डलं नेकपा (एमाले)या अध्यक्ष झलनाथ खनालनाप नेपाःया समसामयीक राजनीतिक विषयलो् सहलह याःगु दु । नींछम्ह दुजः दुथ्यागु चिनियाँ पुचः वशेष विमानपाखें म्हिगः नेपाः थ्यंका वयेवं माओवादी व नेपाली कांग्रेसया नेतातनाप होटल सोल्टीइ भेटवार्ता याःगु खः ।
