प्रतिवेदन विस्तारित बैठकय् सहलह जुइगु
एकीकृत नेकपा (माओवादी)या केन्द्रीय बैठकय् पेश जूगु स्वंगू प्रतिवेदन संश्लेषण यानाः छगू हे प्रतिवेदन दयेकेगु जिम्मा पार्टी अध्यक्ष पुष्पकमल दाहाल 'प्रचण्ड'यात ब्यूगु दु ।
छुं दिं न्ह्यः निसे पार्टी मू ज्याकू कोटेश्वर पेरिस डाँडाय् न्ह्यानाच्वंगु बैठकया लिप्पांगु न्हि थौं पार्टी अध्यक्ष प्रचण्ड व उपाध्यक्षत मोहन वैद्य 'किरण' व डा. बाबुराम भट्टराईया प्रतिवेदनया सकारात्मक बुँदात दुथ्याःगु छगू हे प्रतिवेदन न्ह्यब्वयेगु जिम्मा प्रचण्डयात ब्यूगु खः । उगु प्रतिवेदन वइगु कात्तिक ६ गते निसें येँय् जुइगु केन्द्रीय कमिटिया विस्तारित बैठकय् अध्यक्ष प्रचण्डं पेश याइगु जानकारी प्रवत्ता दिनानाथ शर्मां धयादिल ।
अथेहे बैठकं नेपाःया व्यक्तिया खँल्हाबंला टेप इन यानाः सार्वजनिक यायेगु आन्तरिक सुरक्षा व राष्ट्रिय स्वाभिमान विरुद्ध जूगु ठहर याःगु दु । माओवादीं भारत, अमेरीकी व दरवारं टेप इन यानाः सार्वजनिक याःगु धासें गम्भीर आपत्ति प्वंकूगु दु । प्रवक्ता शर्मां विदेशी हस्तक्षेपकारीतय्सं टेप सार्वजनिक यागुलिं मानवअधिकार व राष्ट्रिय स्वाभीमाननाप स्वानाच्वंगु थ्व विषयबारे सहलह व छानविन जुयाच्वंगु धयादिल ।
