मधेशी मोर्चा लिसे प्रधानमन्त्रीया सहलह
प्रधानमन्त्री माधवकुमार नेपालं संयुक्त लोकतान्त्रिक मधेसी मोर्चाया स्वंगूलिं दलनाप सहलह यानादीगु दु ।
आइतवाः सिंहदरवारय् च्वंगु प्रधानमन्त्रीया ज्याकूथी मधेसी मोर्चानाप लिप्पांगु राजनीतिक अवस्था व अनमिनया म्याद लगायतया विषयलय् प्रधानमन्त्रीं सहलह यानादीगु खः । अनमिनया म्याद व कार्यादेशया बारे सरकार व माओवादीं संयुक्त राष्ट्रसंघय् ब्यागलं ब्यागलं पौ छ्वयाः ब्वलंगु विवादया बारे नं सहलह जूगु खँ उपप्रधानमन्त्री नापं फोरम लोकतान्त्रिकया अध्यक्ष विजयकुमार गच्छदारं कनादिल ।
प्रधानमन्त्रीया राजनीतिक सल्लाहकार रघुजी पन्तं न्ह्यानाच्वंगु राजनीतिक गतिरोध क्वचायेकेगु विषयसं सहलह जूगु धयादिल । बैठकय् संसद्य् न्ह्क्वः तक चुनाव जुयां नं प्रधानमनत्री ल्ययेमफेवं देय् थप संकटय् लाःगु धासें प्रधानमन्त्री नेपालं लोकतान्त्रिक सरकार व राष्ट्रिय सरकार निर्माणय् ध्यान बीत मोर्चायात इनाप यानादिल ।
सहलहलय् फोरम लोकतान्त्रिकया अध्यक्ष गच्छदारया नापं तमलोपाया अध्यक्ष महन्थ ठाकुर व सद्भावनाया राजेन्द्र महतोलगायतया नेतातय् ब्वति दुगु खः ।
