चिनियाँ पुचः येँय्
प्रधानमन्त्री ल्ययेगु प्रक्रिया ताःहाकः जुयाच्वंगु इलय् चिनियाँ कम्युनिष्ट पार्टीया छगू उच्चस्तरीय प्रतिनिधिमण्डल नेपाः थ्यंकवःगु दु ।
चिनियाँ कम्युनिष्ट पार्टीया केन्द्रीय छ्याञ्जे ही. याङया नेतृत्वय् २१म्ह दुजः दुथ्यागु पुचः थौं येँ थ्यंकवःगु खः । नेपाःया स्वंगू मू राजनीतिक दलत एनेकपा (माओवादी), नेपाली कांग्रेस व नेकपा (एमालें) चिनियाँ कम्युनिष्ट पार्टीया प्रतिनिधियात नेपाः भ्रमणया निंतिं ब्वंगु खः । उच्चस्तरीय चिनियाँ प्रतिनिधि मण्डलयात लसकुस यायेत माओवादी विदेश विभाग प्रमुख कृष्णबहादुर महरा, कांग्रेस उपसभापति प्रकाशमान सिंह व एमाले नेता केपी शर्मा ओली त्रिभुवन विमानस्थल थ्यंका लसकुस यानादीगु खः ।
मूमू राजनीतिक दलया ब्वनाय् नेपाः थ्यंकवःगु प्रतिनिधिमण्डलं राजनीतिक दलया प्रमुख नेतात व राष्ट्रपति डा. रामवरण यादव, प्रधानमन्त्री माधवकुमार नेपाल लगायतयात नापलायेगु ज्याझ्वः दु ।
