कोइराला व बेलायती राजदूत दथुइ खँल्हाबंला
नेपाःया शान्ति प्रक्रिया व सरकार निर्माणया ज्या लिबानाच्वंगु प्रति नेपाःया निंतिं बेलायती राजदूत जोन एन्थोनी टक्नटं च्यूता प्वंकादीगु दु ।
शनिवाः नेपाली कांग्रेसया कार्यवाहक सभापति सुशील कोइराला नाप खँल्हाबंला यानादिसें राजदूत टक्नटं राजनीतिक गतिरोध क्वचायेकेत दलत छप्पँ जुइत सुझाव बियादिल । कोइराला निवास महाराजगञ्जय् जूगु खँल्हाबंलाय् वय्कलं दलत दथुइ सहमति यानाः सरकार दयेकेमाःगु धयादिसें शान्ति प्रक्रिया तकं लिच्वलय् थ्यंकेत सुझाव बियादिल ।
उगु इलय् अनमिनया भूमिका व कार्यावधि बारे तकं सहलह जूगु खः । कार्यवाहक सभापति कोइरालां अनमिनं विश्वसनीय भूमिका म्हिते मफूगु धयादिल । अनमिनया भूमिका व कार्यादेश बारे सरकार व माओवादीं राष्ट्रसंघयात व्याग्लं व्याग्लं पौ छ्वयेवं अमेरिका, भारत, फ्रान्स व बेलायतया राजदूतं छुं दिं थुखे निसें कुटनीतिक नापलाय् ज्या तच्वय्कूगु दु ।
