समाचारकर्मीतय् समाचार !
येँ (सन्ध्या टाइम्स)/समाचार च्वइपिं समाचाकर्मीत हे जब समाचारया विषय जुइ तब स्थितिं मेमेगु हे मोड काइगु जुयाच्वन। नांजाःगु न्हिपौ "कान्तिपुर'या जलस्रोत सम्बन्धी समाचार च्वइम्ह संवाददाता विकास थापां अन हे ज्या याइम्ह थः सहकर्मी मय्जु मैना धितालयात ई�मेलपाखें लाथेपाथे च्वयाः 'सेक्सुयल ह्यारेसमेन्ट' याःगु खँयात कयाः थौंकन्हय् जुयाच्वंगु विवाद आः प्रेस काउन्सिलय् तकं मेगु विवादया विषय जूवंगु दु ।
थुकिया बारे बांमलाक समाचार च्वःम्ह 'साँघु' वाःपौया सम्पादकयात कारवाही यायेमाः धकाः मिसापिं पत्रकारतय्सं तःगु उजुरीयात प्रेस काउन्सिलं वेवास्ता यात धकाः अन थ्व विवाद पिहां वःगु खः। 'साँघु'या सम्पादक गोपाल बुढाथोकी थः हे प्रेस काउन्सिलया दुजः खः। म्हिगः काउन्सिलय् थ्व बारे जूगु बैठकय् बुढाथोकी मवःगुलिं मिसापिं पत्रकारतय्सं काउन्सिल अध्यक्षया हे राजीनामा माग यात ।
उखे थ्व प्रकरणय् लानाः थौंकन्हय् हनुमानध्वाखा खोरय् लानाच्वंम्ह पत्रकार विकास थापां थःगु सफाई बारे छपु च्वसु हे च्वसें कान्तिपुरया व्यवस्थापनं थःत फँसे याःगु व मैना धिताल उकिया गोटी जक जूगु खः धकाः धाःगु दु। वय्कःया पौ छुं नं पत्रिकां छापे धाःसा मयाः। उकी वय्कलं थःत सफाईया मौका तकं मबिसे पत्रिकां निष्काशन याःगु खः धासें थम्हं अज्याःगु ज्या यानागु मखु धकाः दावी यानादीगु दु ।
उखे पीडित मय्जु मैना धितालं धाःसा थ्व प्रकरणय् सुनां नं थःगु फोटो समेत समाचार प्रकाशन मयायेत इनाप यासें उकिं थःत थप पीडित याइगु खँ धयादीगु दु ।
