सतक मस्तलिसे बाखं दबू
बाखं दबू व ओलम्पस क्लबया मंकाः ग्वसालय् निष्ठानन्द स्मृति कक्ष, ओमबहालय् वंगु मंगलबाः सतक मस्तलिसे छगू अन्तर्क्रिया ज्याझ्वः जुल। ज्याझ्वलय् बाखं दबूया नायः लक्ष्मण राजवंशी, प्रा.नर्मदेश्वर प्रधान, राजा शाक्य व ओलम्पस क्लबया नायः पवित्र बज्राचार्यपिंसं थीथी बाखं व घटना न्ह्यब्वयादिल ।
सतकय् मस्त गुकथं थ्यनी अले इपिं डेन्राइट व मेमेगु लागू वासःया कुलतय् गुकथं दुनी व इमिगु समस्या छु छु दु? थुपिं ब्याक्कं खँया जानकारी बाल संरक्षण मञ्च नेपालया नायः खगेश रञ्जितकारं बियादीगु खः ।
सतक मस्तलिसे थीथी न्ह्यसः न्यनाः इपिंपाखें थीथी लिसः कयाः अन्तर्क्रियाय् बाखं च्वमिपिं मोतिलक्ष्मी शाक्य, बद्रि वेदना, विमला शाक्य, हरिकृष्ण डंगोल, मोहिनी चित्रकार, तुयु पुं, रीतादेवी प्रधान, राजित श्रेष्ठ, सुनिता माःजु व शरद कसाःपिंसं ब्वति कयादीगु खः। सहभागी झिंछम्ह सतक मस्तय्सं थःथःगु अनुभव कनेगुनापं म्येँ हालेगु व चिनाखँ नं न्यंकेगु ज्या याःगु खः।
बाखं च्वमिपिंत थीथी थासय् यंकाः बाखं गोष्ठी यायेगुया लिसें समाजया थीथी पक्षयात न्ह्यब्वयाः बाखं च्वयेगु व च्वकेगु ताः तयाः बाखं दबुलिं थज्याःगु ज्याझ्वः न्ह्याकूगु खः। थुकथं बाखं दबू आः याकनं हे सेन्ट्रल जेलय् वनाः अन दुपिं बन्दीतलिसे नं अन्तर्क्रिया ज्याझ्वः याइगु ग्वसाः दु ।
