राज्य पुनसंरचना आयोग अमान्य : कोइराला
नेपाली कांग्रेसया सभापति व पुलांम्ह प्रधानमन्त्री गिरिजाप्रसाद कोइरालां माओवादी नेतृत्वया सरकारं सहमति विपरीत गठन याःगु राज्य पुनसंरचना आयोग थःपिं मान्य मजुइगु खँ धाःगु दु ।
आइतवा: कोइराला निवास महाराजगंजय् जूगु कांग्रेस नेतातय् बैठकय् कोइरालां संसदय् प्रधानमन्त्रीं सहमतिया राजनीतियात निरन्तरता बीगु प्रतिबद्धता प्वंकूगु निप्यघौ मजुइवं सहमतिया विपरीत ज्या याःगु धासें आपत्ती प्वंकूदीगु दु । कोइरालां संविधानय् हे राजनीतिक सहमति कथं आयोग गठन यायेगु खँ न्ह्यथंनातसां थुकीयात बेवास्ता याःगुलि आश्चर्य प्वंकादिल ।
बैठकय् कांग्रेसया आगामी झिंनिक्वःगु महाधिवेशनया तयारी बारे नं सहलह जूगु खः । कोइरालां महाधिवेशनया निंतिं लगेजुइत पार्टी नेतातय्त निर्देशन बियादीगु दु । संविधानय् दुथ्याकेमाःगु महत्वपूर्ण विषयवस्तुया बारे नं स्पष्ट धारणा देयेकेत नेतातय्त बः बियादिल । अथेहे बैठकय् माओवादी लाडाकूतय् सेना समायोजन बारे नं सहलह जूगु खः । माओवादीं समायोजन प्रक्रिया तहाकेकाः संविधान निर्माण तकं प्रभावित यायेत स्वःगु द्वपं बैठकय् नेतातय्सं ब्यूगु खः । बैठकय् वरिष्ठ नेता शेरबहादुर देउवा, कार्यवहाक सभापति सुशिल कोइराला, महामन्त्री केबी गुरुङ व विमलेन्द्र निधी लगायत नेतातय् उपस्थिति दुगु खः ।
कोइराला व ओली दथुइ खँल्हाबंला
अथेहे आइतवाः कोइराला निवास महाराजगंजय् नेपाली कांग्रसया सभापति व एमालेया प्रभावशाली नेता केपी शर्मा ओलीया दथुइ खँल्हाबंला जूगु दु । खँल्हाबंलाय् समसामयीक राजनीतिक घटनाक्रमया विषयलय् खँ जूगु खः ।
खँल्हाबंला लिपा संचारकर्मीत नाप खँल्हानादिसें नेता ओलीं राष्ट्रिय सहमतिया सरकारया बाहेक आःया सरकारया औचित्य मदुगु धयादीगु दु । वयेकलं सहमतिया सरकार गठन जुइमफुसाः दलत दथुइया सहमति व सहकार्यया लँपू त्वधला राजनीतिक ध्रुवकरण जुइफुगु खँ धयादिल । 'सहमति व सहकार्यया लँपू त्वताः ध्रुवीकरणया लँपूपाखे वंसाः देय्यात सकारात्मक लँय् न्ह्याकीमखु ।' वयेकलं धयादिल, - 'थ्व सरकार चले हे मजू, दच्छि अथें वनः राष्ट्रिय सहमतिया सरकार आवश्यक दु ।' वयेकलं सहमतिया सरकार गठन जुइफुसाः जक ईलय् हे संविधान निर्माण व शान्ति प्रक्रियाया तार्किक निष्कर्षय् थ्यंकेत ग्वहालि जुइ धयादिल ।
