विश्वया दकलय् मचाम्ह फोटोग्राफर !
येँ (सन्ध्या टाइम्स)/विश्वया दकलय् मचाम्ह फोटोग्राफर जुयाः गिनिज बुकय् नां दर्ता याकेगु लागिं छम्ह नेवाः मिसामचां अन्तिम कुतः यानाच्वंगु दु ।
सातदोबाटोय् छेँ दुम्ह वरिष्ठ फोटोग्राफर राजेन्द्र श्रेष्ठया झिंप्यदँ दुम्ह म्ह्याय् सुभेक्षा श्रेष्ठयात विश्वया हे दकलय् क्वकालिम्ह मिसाम्ह फोटोग्राफरया कीर्तिमान तयेगु ताः तयाः थ्व कुतः खः। उकिया नितिं सुभेक्षां न्हय्दँ दुगु इलंनिसें हे फोटोग्राफी शुरु याःगु खःया थ्व झ्वलय् वय्कलं स्वद्वःपाः फोटो खिचे यानादीधुंकूगु दु। उकी मध्ये १६० पाः फोटो थ्वहे वइगु भदौ २९ गतेनिसें ३१ गते तक सार्वजनिक ब्वज्याय् तयेगु तयारी जुयाच्वंगु दु ।
गिनिज बुकय् रेकर्ड तयेगु नितिं याइगु उगु फोटो प्रदर्शनी ज्याझ्वःया बारे जानकारी बीत कन्हय् विश्वया दकलय् दकलय् तःधिकःगु महाद्यःया मूर्ति दुगु सांगाय् छगू पत्रकार सम्मेलन याइगु जूगु दु। सुभेक्षा श्रेष्ठं तत्कालिन जुजु ज्ञानेन्द्रंनिसें वर्तमान प्रधानमन्त्री माधव नेपाल, राष्ट्रपति डा. रामवरण यादवया किपाया नापं सम्पदा सम्बन्धी नं आपालं फोटो कया तयेधुंकूगु दु ।
