सरकारया इनाप माओवादी व काङ्ग्रेसपाखें अस्वीकार
कामचलाउ सरकारं पूर्ण बजेट हयेगु धकाः याःगु इनाप एकीकृत नेकपा (माओवादी) व नेपाली काङ्ग्रेसं अस्वीकार याःगु दु । अर्थमन्त्री सुरेन्द्र पाण्डें माओवादी व काङ्ग्रेसया मुख्य सचेततलिसे बुधवाः सहलह यानाः असोज १० गते न्ह्यः न्हूगु सरकार दयेकीगु सम्भावना मदुगु व व स्वयाः न्ह्यः पूर्णबजेट मवःसा देशया अर्थतन्त्र ठप्प जुइगु धासें पूर्णबजेट हयेत सहमति फ्वंगु खः । तर माओवादी व काङ्ग्रेसं कामचलाउ सरकारं पूर्ण बजेट हयेमखनीगु धासें अर्थमन्त्री पाण्डेया इनाप अस्वीकार याःगु खः । प्रधानमन्त्री निर्बाचनय् तटस्थ च्वनाः देशयात अनिर्णयया बन्दी दयेकेगु अले पूर्ण बजेट हयेगु धायेगु जायज मजूगु उमिगु धापू खः ।
सहलहसं ब्वति दुगु माओवादीया मू सचेतक पोष्टबहादुर बोगटी व काङ्ग्रेसया मू सचेतक लक्ष्मणप्रसाद घिमिरें प्रधानमन्त्री निर्बाचनय् ब्वति कयाः देय्यात निकास बीत अर्थमन्त्री पाण्डेया पार्टीं एमालेयात सुझाव बियादीगु खः । सरकारं असोज न्हापांगु वाःदुने पूर्ण बजेट मवःसा कर्मचारीयात तलब नापं बिइमफइगु धयाः वयाच्वंगु दु ।
