सरकारं देय्यात ल्वापुइ घ्वात : डा. भट्टराई
एकीकृत नेकपा (माओवादी)या न्वकु डा. बाबुराम भट्टराईं सरकारं देय्यात ल्वापुपाखे घ्वानाच्वंगु धयादिल । अनमिनया कार्यादेश हिलीगु आसयलिसेया पौ संयुक्त राष्ट्रसंघयात छ्वया सरकारं शान्ति प्रकृया त्वाःथलेगु षडयन्त्र यानाच्वंगु वय्कलं दाबी यानादिल । साहित्यकार ईश्वर रिजाल व केशवप्रसाद पुडासैनीया कृति थौं येँय् उलेज्या यानादिसें डा. भट्टराईं शान्ति प्रकृयाया मुख्य शक्ति माओवादीलिसे संयुक्त राष्ट्रसंघयात पौ छ्वये न्ह्यः परामर्श मयागु धासें असन्तुष्टि प्वंकादिल ।
न्हय्क्वःतक्कया प्रधानमन्त्री निर्वाचनपाखें नं प्रधानमन्त्री ल्ययेमफुगु संयोग जक मजुसे व्यवस्थापिका संसद व संविधानसभा ताःमलाकेगु षडयन्त्र जूगुलिं फुक्क देशभक्त शक्तियात छधी जुइत इनाप यानादिल । पुरातनवादी व प्रतिगामी शक्तिं झिदँया सशस्त्र जनयुद्ध व जनआन्दोलनया उपलब्धी अःखः यायेगु षडयन्त्र जुयाच्वंगु वय्कःया धापू खः ।
