नेपा: सरकारया भूमिका शान्ति सम्झौता अःखः : अनमिन
संयुक्त राष्ट्रसंघीय राजनीतिक मिसन अनमिनं नेपाली सेना दथुइ अनुगमन यायेमज्यूगु नेपाल सरकारया धापू बृहत शान्ति सम्झौता अःखः जूगु धाःगु दु । अमेरिकाया न्युयोर्कस्थित सुरक्षापरिषद बैठकय् नेपाल सम्बन्धी प्रतिवेदन न्ह्यःब्वसें अनमिन प्रमुख करिन ल्यानग्रेनं थथे धयादीगु खः । सेनादथुइया अनुगमनया विषययात कयाः नेपाल सरकारं शान्ति प्रकृयाय् विवाद हःगु ल्यान्ग्रेनं धयादिल ।
नेपाली काँग्रेस व नेकपा एमालेलिसेया छुं दलया उक्साहटय् नेपाली सेनाया प्रधानसेनापति छत्रमानिसंह गुरुङं अनमिनयात लित सःतेत लबिङ याःगु धासें च्यूताः प्वंकादिल ।
अनमिन पक्षपाति जूगु धइगु द्वपंया खण्डन यासें वय्कलं निराशाजनक स्थितिया शान्ति प्रकृयायात पाय्छि लँपुइ हयेत नेपालया राजनीतिक दलत ताःमलाःगु धयादिल ।
शान्तिप्रकृया ताःमलाःसां नं अपेक्षा याःगु स्वयाः नं तसकं सुस्त व अनियमित तरिकां न्ह्यःने न्ह्यानाच्वंगु धासें वय्कलं सरकार गठन सम्बन्धी समस्या व अविश्वासया वातावरण तत्काल चीकेत नेपाःया राजनीतिक दलतय्त इनाप यानादीगु दु । इलय् न्हूगु संविधान पिथनेमाःगु व सेना समायोजन सम्बन्धी समस्या ज्यंकेगु शान्तिप्रकृयाया मुख्य ज्या जूगु ल्यानग्रेनं धयादिल । नेपालय् न्ह्यानाच्वंगु असुरक्षा व दण्डहीनताया अवस्था शान्तिप्रकृयाया मुख्य हाथ्या जूगु वय्कःया धापू खः ।
