माओवादी बैठक कन्हय्
एकीकृत नेकपा (माओवादी) केन्द्रीय समितिया बैठक कन्हय्निसें येँय् च्वनीगु जूगु दु । थ्व स्वयाः न्ह्यःया बैठकय् नायः पुष्पकमल दाहाल 'प्रचण्ड' व न्वकुपिं मोहन वैद्य
'किरण' व डा. बाबुराम भट्टराईं थःपिनिगु प्रतिवेदनय् पिदंगु न्ह्यसःया लिसः बिइत ई फ्वंगु व प्रधानमन्त्रीया निर्वाचन नं लाःगुलिं बैठक अनिश्चितकालया निंतिं स्थगित याःगु खः ।
प्रवक्ता दीनानाथ शर्मां कन्हय् च्वनीगु बैठकय् नायः व न्वकुपिंसं थःपिनिगु प्रतिवेदनय् पिदंगु न्ह्यसःया लिसः बिइगु जानकारी बियादिल । बैठकय् नायः व न्वकुपिनिगु ब्यागलं ब्यागलं राजनीतिक प्रतिवेदन न्ह्यब्वःगु दु । प्रतिवेदनय् खँ तसें केन्द्रीय दुजःतय्सं स्वंगुलिं प्रतिवेदनयात छगू हे दयेकेत नेतृत्वयात सुझाव ब्यूगु खः ।
बैठकं छक्वःपतिकंया प्रधानमन्त्री निर्बाचनया समीक्षा यासें पार्टीया वइगु रणनीति क्वःछिइ ।
