'निगू सेनया बारे तत्काल सम्बोधन मयासाः खतरा'
नेपाः स्थित राष्ट्रसंघीय मिसन अनमिनया प्रमुख करिन ल्यानग्रेनं नेपालय् दुगु नेपाली सेना व माओवादी सेनाया बारे तत्काल सम्बोधन मयसाः थुकीं गम्भीर खतरा ब्वलंकेफूगु ख्याच्वः बियादीगु दु । वंगु चान्हय् सुरक्षा परिषदय् नेपाःया बारे प्रतिवेदन न्ह्यब्वयादिसें वय्कलं सेना समायोजन व पुनर्स्थापना यायेगु निंतिं ग्वाहालि यायेत नेपालय् दुगु अनिमनयात राजदीतिक दलतय्सं मखूगु व आधारहीन द्वपं बियाः ज्यायेत थाकूगु खँ धयादिल । वय्कलं राजनीतिक दलत दथुइया वैमनश्यताया कारणं शान्ति प्रकृया धरापय् लाःगु नं धयादिल ।
वय्कलं नेपाःया शान्ति प्रकृया असफल थ्यंक मजुसां अपेक्षा याःगु स्वयां तसकं सुस्त व अनियमित तरिका न्ह्याः वनाच्वंगु धयादिल । वय्कलं सरकार गठन सम्बन्धी समस्या व अविश्वासया वातावरण तत्काल चीकेत राजनीतिक दलतय्त इनाप नं यानादिल ।
थ्वहे दथुइ सरकारं अनमिनया म्याद प्यलाः थप यायेत राष्ट्र संघयात पौ छ्वःगु दु । प्रधानमन्त्री माधवकुमार नेपालं ल्हाःचिं तयातःगु पौलय् अनमिनया कार्यादेशया बारे धाःसा छुं नं खँ न्ह्यथंनातःगु मदु । सरकारं अनमिनयात नेपाली सेनाया अनुगमन पाखें मुक्त यानाः जक म्याद थप यायेगु खँ धयाच्वंगु खःसां मंगलवाः छ्वःगु पौलय् अनमिनया कार्यादेशया बारे छुं नं खँ च्वयातःगु मदु । अनमिनया म्याद थ्वहे भदौ ३० गते क्वचायेत्यंगु दु ।
