'वीरता व बलिदानया गाथायात संस्कृति दयेके'
एकीकृत नेकपा (माओवादी)या केन्द्रीय दुजः लिसे सभासद् अमृता थापा मगरं तीज थेंज्याःगु मिसातय्त शोषण यायेगु संस्कृतियात स्वयाः नं वीरता व बलिदानया गाथाया दिंयात संस्कृतिया रुपं विकसित यायेमाःगु खँ धयादीगु दु ।
मंगलवाः येँय् अखिल नेपाल महिला संघ क्रान्तिकारीपाखें याःगु तीज नखः संस्कृति व मिसा मुक्ति बिषयक अर्न्तक्रिया ज्याझ्वलय् न्वंवानादिसें वय्कलं थथे धयादीगु खः । वय्कलं समग्र मिसाया पक्षय् दुगु श्रमय् आधारित संस्कृतियात प्राथमिकता बिइमाःगु खँय् बः नापं बियादिल ।
अथेहे ज्याझ्वलय् अखिल नेपाल जनसांस्कृतिक महासंघया नायः ईश्वरचन्द्र ज्ञवालीं नेपालयात हिन्दू राष्ट्रया रुपं पलिस्था यायेत स्वइपिं हिन्दू अतिवादी तत्वं तीजयात महत्व ब्यूगु धयादिल । वय्कलं तीजया नामय् षडयन्त्रकारी राजनीति दुहाँवंगु धासें संस्कृति ल्यंकेगु नामय् मिसातय्त उपभोग यायेगु यानाच्वंगु धयादिल । राजनीतिक व आर्थिकरुपं मिसातय्सं अधिकार मदुत्तले मिसात गबलें हे मुक्त मजुइगु वय्कःया धापू खः ।
ज्याझ्वलय् माओवादी येँ जिल्ला समितिया सह इाचार्ज श्रीकृष्ण श्रेष्ठं तीज पुचः पुचलय् सम्पति व तडक भडक प्रर्दशन यायेगु सुन्दरी धेंधेंबल्लाः कासाया अघोषित रुपं जूगु धयादिल । वय्कलं यदि मिसात धात्थें हे मुक्त जुइगु खःसा मिसातय्सं हरेक हाथ्यालिसे ल्वायेत न्ह्याबलें तत्पर जुइमाःगु धयादीगु दु ।
ज्याझ्वलय् माओवादीया पोलिटब्युरो दुजः निनु चापागाईं धर्मलिसे स्वानाच्वंगु आपालं संस्कृतित सामन्तवादीतय्सं थःगु फाईदाया निंतिं निमार्ण याःगु धयादिल । वय्कलं धर्मं गलत खँया ब्याख्या याःगु धयादिसें धर्म सामन्तवादी बिचारधारा जूगु खँ न्ह्यथनादिल ।
ज्याझ्वलय् अखिल नेपाल महिला संघ क्रान्तिकारीया केन्द्रीय दुजः लिसे जिल्ला नायः सारदा महत सभासद् तारा घर्ती मगर लगायतिपंसं थःथःगु बिचाः प्वंकादीगु खः ।
