व्यवस्थापिका संसद न्हय्क्वःगु चरणय् नं ताःमला
व्यवस्थापिका संसद न्हय्क्वःगु चरणया निर्वाचनपाखें नं न्हूम्ह प्रधानमन्त्री ल्ययेत ताःमलाःगु दु । मेगु निर्वाचन असोज १० गते यायेगु क्वःछ्यूगु दु ।
व्यवस्थापिका संसदय् थौं जूगु निर्वाचनय् प्रधानमन्त्रीया उम्मेदवारपिं एकीकृत नेकपा (माओवादी)या नायः पुष्पकमल दाहाल 'प्रचण्ड' व नेपाली काङ्ग्रेस संसदीय दलया नेता रामचन्द्र पौडेलं बहुमत थ्यंकेमफयेवं थौंया निर्वाचन नं निरर्थक जूगु खः ।
थौं जूगु निर्वाचनय् माओवादी उम्मेदवार प्रचण्डया पक्षय् निसः व न्यय्निगू मत लाःगु खःसा विपक्षय् सच्छि व झिगू मत व तटस्थय् सच्छि व न्यय्गू मत लाःगु खः । प्रचण्डया निर्वाचनया इलय् न्यासः व नीछम्ह सभासद्पिनिगु ब्वति दुगु खः । प्रचण्डं खुक्वःगु चरणया प्रधानमन्त्री निर्वाचन स्वयां झिंनिगू मत जक अप्वः हःगु खः ।
अथेहे मेम्ह प्रत्यासीलिसे नेपाली काङ्ग्रेस संसदीय दलया नेता रामचन्द्र पौडेलया पक्षय् सच्छि व झिंगुगू मत विपक्षय् निसः व पीन्यागू मत लाःगु खः । ब्वति दुपिं न्यासः व झिंन्याम्ह मध्ये सच्छि व न्यय्छम्ह सभासद् धाःसा पौडेलया निर्वाचनया इलय् तटस्थ च्वंगु खः ।
मधेशी जनअधिकार फोरम लोकतान्त्रिकं निर्वाचनय् सुयात समर्थन यायेगु धइगु निर्णय कायेमफयेवं निर्वाचनय् ब्वति मकासाः मधेशी जनअधिकार फोरम नेपालं नं थौंया निर्वाचनय् ब्वति काःगु मदु । एमाले व निगू मधेशी दल धाःसा थौं नं तटस्थ च्वंगु खः ।
थ्व स्वयाः न्ह्यः साउन ५, ७, ११, २१ भदौ ७ व २० गते जूगु निर्वाचनय् सुनां नं माःगु बहुमत थ्यंकेफुगु मफुगु खः ।
