माओवादी सहमति, सहकार्य व एकताया विपरित : कोइराला
नेपाली कांग्रेसया सभापति व पुलांम्ह प्रधानमन्त्री गिरिजाप्रसाद कोइरालां माओवादी सहमति, सहकार्य व एकताया विपरित वनाच्वंगु खँ धयादीगु दु । वयेकलं सहमति, सहकार्य व एकताया भावनायात प्रधानमन्त्रीं त्वतूगुलिं देशय् जटिल परिस्थिति श्रृजना जूगु द्वपं बियादिल ।
शनिवाः नेपाल टेड्र युनियन कांग्रेसया यलय् जूगु ज्याझ्वयात संबोधन यासें माओवादी नेतृत्वया सरकार गठन लिपा देशय् अराजकताया स्थिति अझ अप्वःगु धयादिल । सभापति कोइरालां देय् अराजकतापाखे वनाच्वंगु धासें अराजकता दिकेत दक्वं छप्पं जुइत इनाप यानादिल । थःगु कार्यकर्ताया ज्या नियन्त्रणय् तये मफया प्रधानमन्त्री पुष्पकमल दाहालं देय्यात गम्भीर अवस्थाय् थ्यंकूगु वयेकलं द्वपं बियादिल ।
अथेहे ज्याझ्वलय् कांग्रेसया वरिष्ठ नेता शेरबहादुर देउवां माओवादीया कारणं देशय् स्थायी शान्ति ह्येगु ज्या अझ थाकुगु धयादिल ।
