अनमिनया म्याद थपबारे निर्णय यायेगु जिम्मा प्रधानमन्त्रीयात
संयुक्त राष्ट्रसंघीय मिसन अनमिनया म्याद थप यायेत मन्त्रिपरिषद ताःमलाःगु दु । अनमिनया म्याद थपया मुख्य एजेण्डालिसे थौं च्वंगु मन्त्रिपरिषद बैठकं अनमिनया म्याद थप यायेगु वा मयायेगु जिम्मा प्रधानमन्त्रीयात ब्यूगु दु ।
बैठकलिपा सरकारया प्रवक्ता व सूचना लिसे सन्चारमन्त्री शंकर पोख्रेलं सम्वन्धित पक्षलिसे परामर्श यानाः प्रधानमन्त्री माधवकुमार नेपालं माःगु निर्णय काइगु जानकारी बियादिल ।
अथेहे मन्त्रिपरिषद बैठकं एकीकृत नेकपा (माओवादी)या विदेश विभाग प्रमुख कृष्णबहादुर महराया टेप प्रकरणबारे छानबिन यायेगु निर्णय नं याःगु जानकारी प्रवक्ता पोख्रेलं बियादिल ।
महरां प्रधानमन्त्री निर्वाचनया निंतिं सभासद न्यायेत न्यय्गू करोड तका फ्वंगु 'नक्कली' अडियो टेप छुं टेलिभिजनतय्सं प्रसारण याःगु खः । टेप भारतं वितरण याःगु शंका आपालं याःगु दु ।
बैठकं निजामति दिवसया लसताय् उत्कृष्ट झिम्ह कर्मचारीयात निजामति सेवा सिरपाः बिइगु निर्णय नं याःगु दु । अथेहे मन्त्रिपरिषद् बैठकं सेना समायोजन विशेष समितिया म्याद प्यला थप यायेगु निर्णय नं याःगु दु ।
