मेगू निर्वाचन मंगलवाः, थौं नं निम्हं उम्मेदवार बुत
फोरमं निर्वाचन बहिष्कार
प्रधानमन्त्रीया निंतिं आइतवाः जूगु खुक्वःगु चरणया निर्वाचनय् नं निम्हं उम्मेदवारत बुइवं मेगू चरणया निर्वाचन भदौ २२ गते मंगलवाः जुइगु जूगु दु । कार्यव्यवस्था परामर्श समितिया बैठकं मेगू निर्वाचन मंगलवाः न्हिय् ३बजे यायेगु निर्णय याःगु खः ।
थ्वस्वयां न्ह्यः संसदय् जूगु खुक्वःगु चरणया निर्वाचनय् माओवादीया उम्मेदवार पुष्पकमल दाहाल 'प्रचण्ड' व कांग्रेसया उम्मेदवार रामचन्द्र पौडेल निम्हेसिनं नं स्पष्ट बहुमत खाके मफेवं थौं नं न्हूम्ह प्रधानमन्त्री ल्ययेत व्यवस्थापिका संसद असफल जूगु खः ।
थौं जूगु मतदानय् प्रचण्डया पक्षय् २४०, विपक्षय् १०१ व तटस्थय् १६३ मत वःगु खःसा पौडेलया पक्षय् १२२, विपक्षय् २४२ व तटस्थय् १७२ मत लाःगु खः । संसदय् उपस्थित कुल सभासद्तय् ल्याखय् सुंनं उम्मेदवारं बहुमत खाके मफेवं निम्ह उम्मेदवार खुक्वः खुसी नं बूगु खः ।
मधेशी जनअधिकार फोरमं धाःसा थौंया निर्वाचन बहिष्कार याःगु खः । मंकाः मधेशी मोर्चाया बैठकय् फोमरं तटस्थ च्वनाः देय्यात अनिर्णयया बन्दी दयेके मज्यूगु खँ तःगु खःसां मोर्चाय् दुथ्याःगु मेगू स्वंगूलिं दलं तटस्थ हे च्वनेगु अडान कायेवं फोरम संसदीय दलया बैठक च्वनाः निर्वाचन बहिष्कार यायेगु निर्णय याःगु खः ।
