मोर्चा तटस्थ हे च्वनीगु, एमालें कांग्रेसयात न्हूगु प्रस्ताव

कन्हय् जुइगु खुक्वःगु चरणया निर्वाचनय् नं मंकाः मधेशी मोर्चा तटस्थ हे च्वनीगु जूगु दु । मोर्चाया शनिवाः च्वंगु बैठकं मधेशया मुद्दाय् निगूलिं दलं अझ नं सकारात्मक लिसः मब्यूगुलिं थःपिनिगु पुलांगु हे अडान कायम जूगु खँ धाःगु दु ।

मधेशी जनअधिकार फोरम व फोरम लोकतान्त्रिकं खुक्वःगु चरणय् एनेकपा (माओवादी)यात ग्वाहालि याइगु बुखँत सार्वजनिक जुयाच्वंगु इलय् मोर्चां तटस्थ हे च्वनेगु निर्णययात निरन्तरता ब्यूगु दु ।

उखे नेकपा (एमालें) कांग्रेसं ३०१ मत हःसाः एमालें उकीयात दुई तिहाई थ्यंकाबीगु न्हूगु प्रस्ताव तःगु दु । थौं युवा संघ नेपाल केन्द्रीय संगठन विभागं याःगु छगू ज्याझ्वलय् एमाले महासचिव ईश्वर पोखरेलं कांग्रेसयात बहुमत खाकेत इनाप यानादिसें अथे जुसाः एमालें कांग्रेसयात ग्वाहालि यायेगु धयादिल ।