अझ नं तटस्थ च्वनेगु उचित मखु : ओली
नेकपा (एमाले)या वरिष्ठ नेता केपी शर्मा ओलीं थःगु पार्टी अझ नं तटस्थ च्वनेगु ज्या उचित मजूगु खँ धयादीगु दु ।
भारतय् स्वास्थ्य परिक्षण लिपा शनिवाः येँ थ्यंकादीम्ह ओलीं त्रिभुवन अन्तर्राष्ट्रिय विमानस्थलय् पत्रकारत नाप खँल्हाबंला यानादिसें एमाले सहमतिया निंतिं तटस्थ च्वनाच्वंगु तर एमालें बिचाः याः कथं लिच्वः सकारात्मक पिहांमवगुलिं तटस्थ हे च्वनेगु अडान त्वतेमाःगु धयादिल ।
वय्कलं भदौ २० गते जुइगु खुक्वःगु चरणया प्रधानमन्त्रीया निर्वाचन पाखें नं प्रधानमन्त्री ल्ययेमफुसाः मेगू चरण निसें एमाले तटस्थ मच्वनीगु धयादिल । वय्कलं बहुमतीय पद्धति पाखें हे सरकार गठन यानाः संविधान व शान्ति प्रकृयायात निष्कर्षय् थ्यंकेमाःगु नं धयादिल ।
भारत भ्रमणया झ्वलय् ओलीं भारतीय विदेश मन्त्री प्रणव मुखर्जी, भारतीय जनता पार्टीया नेता लालकृष्ण आडवाणी लगायत नेतातय्त नापलाना खँल्हाबंला नं यानादीगु खः ।
