सुनसरी राजमार्ग क्षेत्रय् बन्द निषेध
बन्द व हड्तालपाखें तन्हूनिसें प्रभावित जूगु पूर्वपश्चिम राजमार्गया सुनसी खण्डय् स्थानीय प्रशासनं शनिवाः निसें बन्द, हड्ताल यायेत निषेध याःगु दु । लगातारया बन्द चीकेत जूगु वार्ता बिना निष्कर्ष क्वचायेवं प्रशासनं निषेधादेश जारी याःगु खः । थ्व आदेश मेगु आदेश जारी मजूतल्लेया निंतिं लागू जुइगु सुनसरी प्रशासनं धाःगु दु ।
काशीया खुशीबालं विस्थापित जुपिंसं वंगु झिन्हु न्ह्यः निसें राजमार्गया उगु खण्डय् यातायात चलेजूइ ब्यूगु मदु । सुनसरीया सहायक प्रमुख जिल्ला अधिकारी फणिन्द्रमणि पोखरेलया कथं शनिवाः सनिलय्या न्ह्यताः ईलं निसें पूर्वपश्चिम राजमार्गया काशी ब्यारेजं निसें सुनसरीया लौकहीतक बन्द, हडताल, धर्ना व प्रर्दशन याये मदइ कथं आदेश जारी याःगु खः ।
उगु क्षेत्रय् यातायात दिकेगु लगायत निषेध याःगु क्रियाकलाप याईपिंत आवश्यक कानुन कथं कारबाही याइगु प्रशासनं धाःगु दु । पोखरेलया कथं स्थानीय प्रशासनं ऐन २०२८या दफा ३ नं ब्यूगु अधिकार छ्याला उक्त आदेश जारी याःगु खः ।
सरकारं गठन याःगु उच्चस्तरीय कार्यदलया प्रतिवेदन कार्यान्वयन यायेमाःगु लगायतया माग तयाः काशी खुशीबालं पीडित संघर्ष समितिं झिन्हुनिसें उगु क्षेत्रय् यातायात बन्द यानावयाच्वंगु दु । बन्द चीकेत शुक्रवाः आन्दोलनकारी व प्रशासन दथुइया बैठक बिना निष्कर्ष क्वचाःगु खः ।
