'सभासद् न्यायेत माओवादीं ५०करोड फ्वन'
एकीकृत नेकपा (माओवादीं) खुक्वःगु चरणया प्रधानमन्त्री निर्वाचनय् थःगु पक्षय् मत बीकेगु निंतिं सभासद् न्यायेत चीन नाप ५० करोड फ्वंगु खँ नेपाल वान टेलिभिजनं धाःगु दु ।
नेपाल वान टेलिभिजनं शुक्रवा बहनी माओवादी प्रवक्ता कृष्णबहादुर महरां छम्ह चिनियाँ नाप प्रधानमन्त्रीया निर्वाचन् सभासद् न्यायेत ५० करोड फ्वनाच्वंगु टेलिफोनया अडियो न्यंकूगु खः । उगु हे टेलिभिजनयात उदृत यासें थौं थीथी न्हिपतिइ थुगु बुखँ पिहांवःगु खः । भारतं संचालनय् वयाच्वंगु नेपाल वान पाखें सार्वजनिक जूगु अडियो टेपयात भारतीय संचार माध्यमं नं विशेष प्रथामिकता बियाच्वंगु दु ।
उखे माओवादी प्रवक्ता महरां धाःसा शनिवाः छगू विज्ञप्ति पिथनाः उकीया बारे खण्डन यानादीगु दु । थुगु बुखँ व अडियो टेप तथाकथित व कृत्रिम जूगु प्रतिकृया वय्कलं बियादीगु दु । वय्कलं बुखँ पाखें थःगु व्यक्तिगत चरित्रहत्या यायेत स्वःगु धयादिसें थुकीयात सुनियोजित षड्यन्त्रया संज्ञा बियादीगु दु ।
महरा व छम्ह म्हमस्यूम्ह चिनियाँ अधिकारी दथुइ जूगु खँल्हाबंल्हाय् महरां ५० करोड फ्वंगु व उगु ध्यबा बीत चिनियाँ अधिकारीं सहमति नं प्वंकूगु खः । ध्यबाया निंतिं हङकङ, छङदु वा सिंगापुर मध्ये छगू थासय् नापलायेगु बारे सहलह जूगु खः ।
