उम्मेदवारी लितकायेत माओवादी तयार : भट्टराई

एनेकपा (माओवादी)या उपाध्यक्ष डा. बाबुराम भट्टराईं सहमतिया निंतिं माओवादी प्रधानमन्त्रीया उम्मेदवारी लितकायेत तयार जूगु खँ धयादीगु दु ।

गोरखाय् च्वंगु द्रव्यशाह बहुमुखी क्याम्पसया रजत महोत्सवया शुक्रवाः उलेज्या यानादिसें वय्कलं न्याक्वः तक निर्वाचन जुयाः नं प्रधानमन्त्री ल्यये मफुगुलिं जनताय् वितृष्णा अप्वःगु धयादिसें माओवादी उम्मेदवारी लितकायेत तयार जूगु धयादिल । वय्कलं कांग्रेसं नं उम्मेदवारी लितकायेमाःगु व सहमतिया वातावरण सृजना यायेमाःगु खँय् बः बियादिल ।

वय्कलं संसदय् जुयाच्वंगु प्रधानमन्त्रीया निर्वाचन पाखें प्रधानमन्त्री ल्ययेमफेवं राष्ट्रपति व फौजी शासन लागु यायेगु तयारी यानाच्वंगु दावी यानादिल ।