'मदन भण्डारी हत्याया छानबिनयात निरन्तरता बीमाः'
तात्कालिन नेकपा (एमाले)या महसचिव मदन भण्डारीया हत्यया छानबिनयात निरन्तरता बीमाःगु खँय् नेतातय्सं बः ब्यूगु दु । इमिसं हत्याया बारे सत्यतथ्य पिने मवतले छानबिनयात निरन्तरता बीमाःगु खँ धाःगु दु ।
भण्डारीया हत्याय् आधारित संकिपा 'दासदुंगा'या न्हापांगु सो स्वयेधुंकाः एमाले अध्यक्ष झलनाथ खनालं हत्याया बारे छानबिन यानाः सत्यतथ्य पिने ह्येत सरकार नाप माग यानादिल । वय्कलं इतिहासय् थंज्याःगु घटना जुइगुलिं दोषी पत्ता लगे मजुतले मालेगु ज्या न्ह्याकेमाःगु धयादिल ।
अथेहे माओवादी उपाध्यक्ष डा. बाबुराम भट्टराईं दक्वसियां माग कथं दासढुंगा हत्याकाण्डया बारे गम्भीरतापूर्वक छानबिन यायेमाःगु व यदि गम्भीरता पूर्वक छानबिन याःसा सत्यतथ्य पिहांवइगु धयादिल ।
संकिपाया निर्देशक मनोज पण्डितं हत्याकाण्डया छानबिनय् कम्जोरी जुयाः हत्यारायात ज्वनेमफुगुलिं बांलाक छानबिन यायेमाःगु खँय् बः बियादिल ।
