प्रधानमन्त्रीया बारे माओवादीं याकनं हे निर्णय याइ : प्रचण्ड

एनेकपा (माओवादी)या अध्यक्ष पुष्पकमल दाहाल 'प्रचण्डं' माओवादीं प्रधानमन्त्री ल्ययेगु बारे २० गतेया दुने हे न्हूगु निर्णय याइगु खँ धयादीगु दु । वय्कलं न्याक्वः तक जूगु प्रधानमन्त्रीया निर्वाचनं नं प्रधानमन्त्री ल्ययेमफुगुलिं पार्टी मेगू हे निर्णय काइगु धयादिल ।

संसदीय मामिला पत्रकार समाजया दुजःत नाप बुधवाः खँल्हाबंला यानादिसें प्रचण्डं प्रधानमन्त्रीया चक्रब्युह पाखें पिहांवयेत माओवादीया न्ह्यानाच्वंगु केन्द्रीय दुजःतय् बैठकं छुं निर्णय काइगु धयादिल ।

प्रधानमन्त्रीया निर्वाचन यक्व हे जुयाच्वंगु प्रति च्यूताः प्वंकादिसें माओवादी अध्यक्ष प्रचण्डं कांग्रेसं उम्मेदवारी लितमकाःगु व एमाले तटस्थ च्वनाच्वंगुलिं हे प्रधानमन्त्री ल्ययेगु ज्याय् पंग थनाच्वंगु धयादिल ।