महामन्त्री पद जिं हे त्याके : कोइराला
नेपाली कांग्रेसया नेतृ नापं उपप्रधानमन्त्री सुजाता कोइरालां कांग्रेसया झिंनिक्वःगु महाधिवेशनय् महामन्त्री पद थम्हं हे त्याकीगु दावी यानादीगु दु ।
चीनया सांघाईलय् जुयाच्वंगु वर्ल्ड एक्स्पो २०१०या 'नेपाः डे'लय् ब्वति कायेत उखे पाखे झाये न्ह्यः त्रिभुवन अन्तर्राष्ट्रिय विमानस्थलय् पत्रकारत नाप खँल्हाबंला यानादिसें कोइरालां मेपिं दक्वं गुटबन्दीलय् लगे जूगुलिं महामन्त्री पद थःगु हे जूगु धयादिल ।
वय्कलं वर्ल्ड एक्स्पोलय् बुद्ध नेपालय् हे बूगु खः धकाः म्हसिकेगु नापं नेपाःया थीथी पक्षयात कःघानातःगुलिं थुकीं नेपाः भ्रमण २०११य् अझ अप्व पर्यटकतय्त आकर्षित याइगु धयादिल । परराष्ट्र मन्त्री नापं जुयादीम्ह कोइरालां चीनय् चिनिया कम्यिुनिष्ट पार्टीया उच्च नेतातय्त नापलानादीगु ज्याझ्वः नं दु ।
वंगु प्यलाः न्ह्यः निसें सांघाईलय् न्ह्यानाच्वंगु एक्स्पोलय् वइगु सेप्टेम्बर ३यात 'नेपाः डे' कथं फ्यानातःगु दु । उगु न्हिया उलेज्या मन्त्री कोइरालां यानादीगु ज्याझ्वः दु ।
