कांग्रेस सहितया राष्ट्रिय सरकार आवश्यक : ओली
एमालेया वरिष्ठ नेता केपी शर्मा ओलीं कांग्रेस सहितया राष्ट्रिय सरकार देयेकेमाःगु खँ धयादीगु दु । वयेकलं माओवादीया कारणं संविधान लेखन ज्या लिछ्यनाच्वंगु धासें माओवादीया ज्यां देशय् अस्थीरता अप्वयाच्वंगु द्वपं बियादीगु दु ।
शनिवाः पोखराय् जूगु नेपाल किसान महासंघं याःगु ज्याझ्वलय् न्ववासें माओवादी शान्ति प्रकृयायात उपयोग जक यानाच्वंगु दावी यानादिल । वयेकलं संविधान सभा बनोट उपयुत्त मजूगुलिं धाः कथंया संविधान नं च्वयेमफइगु दावी यानादिल । वयेकलं धयादिल - 'संविधान सभाय् जनतायात दुःख बिपिनी बहुमत दुगुलिं जनतां चाहे जू कथंया संविधान निर्माण जूइ फइमखु ।'
अथेहे वयेकलं माओवादीं संक्रकमणकालया ई तहाकः यायेत स्वयाच्वंगु द्वपं ब्यूसें प्रधानमन्त्री पुष्पकमल दाहाल प्रचण्डं अपराधीतय्त संरक्षण याःगु नं धयादिल । प्रधानमन्त्री व एमालेया अध्यक्ष झलनाथ खनाल दथुइ जूगु सम्झौता जूगु कन्ह्ये खुन्हु हे लमजुङय् एमालेया कार्यकर्ताया कुटपिट याःगु खँ न्ह्यथंसें वयेकलं प्रधानमन्त्रीं सरकार व कार्यकर्ता कघाये मफूगु धयादिल ।
