'अनमिनयात लितछ्वयेमते'

संविधानसभाय् दुथ्याःगु स्वंगू चिधंगु दलं नेपाः स्थित राष्ट्रसंघीय मिसन अनमिनयात लितमछ्वयेत इनाप याःगु दु । नेपाः राष्ट्रिय पार्टी, संघीय लोकतान्त्रिक राष्ट्रिय मञ्च व राष्ट्रिय जनमुक्ति पार्टीं बुधवाः मंकाः विज्ञप्तिइ पिथनाः नेपाःया शान्ति प्रकृयायात निष्कर्षय् थ्यंकेत मध्यस्थता यानाच्वंगु अनमिनयात आः हे लितछ्वये मज्यूगु खँय् बः ब्यूगु दु ।

स्वंगू पार्टीं शान्ति प्रकृया क्वचायेकेगु पलेसाः झन् जटिल मोडय् थ्यंगुलिं तत्काल अनमिनयात लितछ्वसाः शान्ति प्रकृया भंग जुइगु व संविधानसभा विघटन जुइगु खतरा जूगुलिं अनमिनयात लितछ्वये मज्यूगु खँ प्रष्ट याःगु दु ।

विज्ञप्तिइ अनमिनया म्याद थप यायेमज्यूगु धाःपिं सरकारया मन्त्रीत व छुंछुं राजनीतिक दलया नेतातय् धापू प्रति नं आपत्ति प्वंकातःगु दु ।