चीनं ग्वहालि अप्वेकीगु

चीनं नेपाःयात देँय्दसं बियावयाच्वंगु विकास ग्वहालि झिगू करोड युआन नं अप्वयेकाः झिंन्यागू करोड थ्यंकेगु जूगु दु । चीन भ्रमण नं शनिवाः देय् लिहांझायादिम्ह परराष्ट्रमन्त्री उपेन्द्र यादवं हिमाली व पहाडी क्षेत्रया विकासया निंतिं बियावयाच्वंगु ध्यबा अप्वयेका स्वीगू लाख युआन बीत चीन सहमत जूगु खँ धयादिल ।

नेपाः-चीन सीमा क्षेत्रय् व्यापारीक नाकाया पूर्वाधार विकास तथा थप व्यापारीक नाकाया पहिचान व संचालन यायेगु विषय्लय् चीननाप सहलह जूगु जानकारी बियादिल । अथेहे चीन सीमाया जनताया निंतिं खाद्यान्न लगायतया अत्यावश्यक वस्तुत चीनया भूमि जुया ढुवानी यायेगु नं निगू पक्ष दथुइ सहलह जूगु खँ परराष्ट्रमन्त्री यादवं कनादिल ।