खुकुरीं पाःगुलिं राजमार्ग बन्द
येँ (सन्ध्या टाइम्स)/थः मनूयात खुकरीं पालाः घाःपाः याना बिउम्ह छम्ह अभियुक्तयात ज्वनेत माग यासें सिन्धुलीया कमलामाइ नगरपालिका वडा ७ या माझिटारय् स्थानीवासीं थौं सुथंनिसें प्रदर्शन याःगु दु ।
स्थानीय मनूतय्सं अनया वीपी राजमार्गय् च्वनाः सुथंनिसें प्रदर्शन यानाच्वंगुलिं उगु राजमार्ग नं अबरुद्ध जुयाच्वंगु दु। स्थानीय राजन घिसिङयात छथ्वः अज्ञात मनूतय्सं म्हिगः खुकुरीं पालाः घाःपाः याना बिउगु खः ।
उगु घटनाया दोषीयात ज्वनाः कारवाही यायेमाःगु माग यासें माझीटारया मिसापिं लगायतया मनूत राजमार्गय् च्वनाः प्रदर्शन यानाच्वंगु खः। प्रदर्शनं यानाः यातायात जाम जूगु दु ।
उगु आक्रमणय् लानाः घाःपाः जूम्ह घिसिङयात वासः यायेत येँय् हःगु दु। खुकुरीं पालाः घाःपाः याना बिउम्ह मनूयात मालेगु ज्या जुयाच्वंगु खँ प्रहरीं धाःगु दु ।
