ख्वपय् सापारु जारी
ख्वप (सन्ध्या टाइम्स)/सापारुया लसताय् छवाःयंकं न्ह्याइगु सापारुया झ्वलय् थन थीथी सांस्कृतिक ब्वज्या न्ह्यानाच्वंगु दु। वडा नं. १, ९ व १२ य् पिदंगु स्वंगू परम्परागत भैलः प्याखंत थीथी थासय् क्यनेगु ज्या न्ह्यानाच्वंगु दु। आइतवाः क्वःनेया भैलःप्याखं थःने हयाः क्यनेहःगु खःसा सोमवाः थःनेया भैलःप्याखं क्वःने यंकाः तालाक्व त्वालय् क्यंगु खः ।
अथेहे १ वडाया नागाचा प्याखं, आस्था सांस्कृतिक परिवारया गाईंचा प्याखं नापं थीथी आधुनिक प्याखं नं सायाः वनीगु लँया थीथी दबुली क्यनेगु यानाच्वंगु दु। सूर्यमढी व नासमना त्वालय् क्यनेधुंकूगु आस्थाया फाकंदली, गाईँचा व आधुनिक ख्यालःत आः ब्यासीइ क्वचायेधुंकाः बोडेया लाछित्वाः व ताथलीया सौडोलय् क्यनेगु तयारी जुयाच्वंगु दु। कृष्णाष्टमिकुन्हु देय्न्यंकं मतयाः वनाः सापारुया फुक्कं ज्याझ्वः क्वचाइ ।
