राष्ट्रिय प्रजापति महोत्सव याइगु

येँ (सन्ध्या टाइम्स)/राष्ट्रिय प्रजापति समाजया ग्वसालय् नरलय् समाजया स्वदँया दीर्घकालीन व अल्पकालीन कार्ययोजना परामर्श गोष्ठी जुल। गोष्ठीइ थीथी कचाया दुजःतयसं स्वदँया दुने यायेफइगु अल्पकालीन व दीर्घकालीन ज्याझ्वःत तयार याःगु खः। नायः गणेशराम प्रजापतिं सभापतिया थासं उलेज्या यानादीगु उगु गोष्ठीइ थीथी शाखाया पदाधिकारीतय् दथुइ पुचः सहलह यानाः सुझावत मुंकूगु खः।
समाजया न्वकु न्हुछेबहादुर प्रजापतिं लसकुस यानाः शुरु याःगु उगु पुचःया संयोजकं उपसमितिया पुचलं तयार याःगु लिखित सुझाव कासें उगु सुझावयात माःगु परिमार्जन यानाः केन्द्रीय समितिया बैठकं पारित यासें लागू यायेगु खँ कनादिल। समाजं याकनं हे पर्यटन वर्षया लसताय् प्रजापति महोत्सव नं यायेत्यंगु दु ।