एमालेया पुचः चीनपाखे
छुं नं हालतं सरकार क्वदलीमखु : खनाल
नेकपा (एमाले)या अध्यक्ष झलनाथ खनालं नेतृत्व यानादीगु एमालेया छगू पुचः चिनियाँ कम्युनिष्ट पार्टीया ब्वनाये शनिवाः चीनपाखे वंगु दु ।
पुचलय् अध्यक्ष खनाल नापं उपाध्यक्ष अशोक राई, सचिव युवराज ज्ञवाली व केन्द्रीय दुजःत सुरेन्द्र पाण्डे व रघुजी पन्त दुथ्याः ।
छवाःयाः निंतिं चीन प्रस्थान याये स्वयांन्ह्यः त्रिभुवन अन्तराष्ट्रिय विमानस्थलय् पत्रकारतनाप न्ववानादिसें अध्यक्ष खनालं वर्तमान सरकार छुं नं हालतय् क्वदलीमखु धयादिल । वयेकलं आःया सरकारया विकल्प मदुगु धासें सरकार विघटनया पलेसाः सत्ता समिकरण तब्याका यंकेमाःगु खँय् बः बियादिल ।
वर्तमान सरकारय् समस्या खनेदुगु स्विकार यासें वयेकलं जटिलता निराकरणया निंतिं दलत नाप परामर्श व सहकार्यया आवश्यकक्ता जूगु धयादिल । निर्धारित ईलय् हे संविधान निर्माण जुइगु धासे संविधान निर्माण यायेत दलत दथुइ सहकार्यया विकल्प मदु धयादिल ।
चीनय् चिनियाँ कम्युनिष्ट पार्टीया वरिष्ठ नेतात नाप खँल्हाबंला यायेगु ज्याझ्व दुगु खँ अध्यक्ष खनालं कनादिल । चीन भ्रमणं देय् लिहांवयेवं अध्यक्ष खनाल भारत वनेगु ज्याझ्व दु ।
