कार्कीयात २०न्हु कुनेगु आदेश
प्रहरी निरिक्षक पदय् बढुवा यानाबी धकाः धुस कयाच्वंगु इलय् ज्वंम्ह सभासद् डोलबहादुर कार्कीयात विशेष अदालतं २०न्हु जेलय् कुनेगु आदेश ब्यूगु दु । मंगलवाः विशेष अदालतं कार्कीयात अनुसन्धानया निंतिं २०न्हु जेलय् कुनेत आदेश ब्यूगु खः । अख्तियार दुरुपयोग अनुसन्धान आयोगं ३०न्हु जेलय् तयेत माग याःसां अदालतं २०न्हु जक कुनेत आदेश ब्यूगु खः ।
अदालतं पिहांवयेगु झ्वलय् कार्कीं थः बामदेव निकट जूगुलिं गुटबन्दीया शिकार जूगु खँ धयादिल । कार्कीं थःगु लच्छिया तलब हे न्यय्द्वः जूगु धायादिसें थःत षड्यन्त्रपूर्व फसे याःगु दावी यानादिल ।
उखे नेकपा (एमालें) घुस प्रकारणया छानबिन यायेत स्वम्ह दुजः दुगु कमिटि गठन याःगु दु । एमाले अनुशासन आयोगया अध्यक्ष अमृतकुमार बोहरां मंगलवाः छगू विज्ञप्ति पिथना थंज्याःगु ज्या याइपिंत कडा कारवाही यायेगु खँ धाःगु दु ।
कार्की व वया ग्वाहालिमी ब्रहमानन्द उदासिनयात अख्तियार दुरुपयोग अनुसन्धान आयोगया पुचलं सोमवाः सनिलय् घुस कयाच्वंगु इलय् ज्वंगु खः ।
