घुस कयाच्वंगु इलय् एमाले सभासद् कार्कीयात ज्वन

प्रहरी निरीक्षक पदय् जागिर याकाबी धकाः ध्यबा कयाच्वंगु इलय् नेकपा (एमाले)या सभासद् डोलबहादुर कार्कीयात ज्वंगु दु । सोमवाः बहनी सभासद् कार्कीयात कलंकीइ च्वंगु कोठां छगू लख ध्यबा सहित अख्तियार दुरुपयोग अनुसन्धान आयोगया पुचलं ज्वंगु खः ।

स्याङ्जा छक्सारया ४८दँया कार्की समानुपातिक पाखें सभासद् जुयादीम्ह खः । कार्की नापं मेम्ह छम्ह ग्वाहालिमी ब्रहमानन्द उदासिनयात भिमसेनगोलाय् च्वंगु कोठां ज्वंगु दु ।

सभासद् ज्वंसाः उकीया बारे सभामुखयात जानकारी बीमाःगु कानुनी व्यवस्था कथं म्हिग बहनी हे अख्तियार दुरुपयोग अनुसन्धान आयोगं सभामुख सुभाषचन्द्र नेम्वाङयात ज्वंगु बारे जानकारी ब्यूगु खः ।