शान्ति प्रक्रियाय् बेलायतं नेपाःयात ग्वहालि यायेगु प्रतिवद्धता
बेलायतं नेपाःया शान्ति प्रक्रिया व विकासय् ग्वहालि यायेगु प्रतिबद्धता प्वंकादीगु दु ।
नेपाःया न्यान्हुयंकया भ्रमण क्वचायेका शनिवा: लिहांझाये न्ह्यः छगू वक्तव्ब पिकानादिसें बेलायती रक्षा राज्यमन्त्री केभान जोन्सं बेलायतया थंज्याःगु प्रतिबद्धता प्वंकादीगु खः । शान्ति, स्थायित्व व लोकतन्त्र सुनिश्चित यायेत न्हूगु संविधान निर्माण व शान्ति प्रक्रियायात तार्किक निष्कर्षय् थ्यंकेत वयेकलं नेपाः सरकारयात इनाप यानादीगु दु । शान्ति प्रक्रियायत निष्कर्षय् थ्यंकेत सेना समायोजन प्रक्रिया महत्वपूर्ण जूगु न्ह्यथंसें वयेकलं उकी सम्भव जू कथंया ग्वहालि उपलब्ध यायेत बेलायत तयार जूगु खँ धायादीगु दु ।
वक्तव्यय् वयेकलं संक्रकमणकालय् कानुनी शासन व राज्यया निकाय विशेष याना स्वतन्त्र न्यायपालिकायात हस्तक्षेप मुक्त यायेत दकलय् महत्वपूर्ण जूगु धासें वयेकलं उखेपाखे नेपाली पक्षया ध्यानाकर्षण याःगु दु । वंगु मंगलवाः नेपाः झायादिम्ह जोन्स शनिवाः देय् लिहांझयादित्यंगु दु ।
अथेहे वयेकलं शनिवाः सुथय् प्रधानमन्त्री पुष्पकमल दाहाल प्रचण्डनाप प्रधानमन्त्री निवासय् खँल्हाबंला यानादिल । खँल्हाबंलाय् नेपाःया शान्ति प्रक्रिया, बेलायती विकास ग्वहालि विस्तार व गोरखा सैनिकया माग लगायतया विषयलय् खँ जूगु खः । माओवादीया पुलांगु लडाकूतय् पुनस्थापना समायोजन व भरणपोषणया बारे नं जोन्स व प्रधानमन्त्री दुथुइ खँल्हाबंला जूगु खः ।
