बल प्रयोग यानाःसां फोहोर वाइगु

येँ (सन्ध्या टाइम्स)/येँय् द्वँचिनाच्वंगु फोहोर वायेगु बारे सिसडोल वासीतलिसे येँ मनपां यानाच्वंगु वार्ता यदि थौं नं क्वमचाल धाःसा कन्हय्निसें बल प्रयोग यानाः जूसां फोहोर वाइगु जूगु दु। येँया फोहोर समस्यायात कयाः येँ मनपाय् डेलिगेशन वंगु नेवाः स्वायत्त राज्य मंकाः संघर्ष समिति व नेवाः जागरण मंचया दुजःतलिसे खँ ल्हासें मनपाया कार्यकारी अधिकृत आनन्दराम पोखरेलं थ्व खँ धयादीगु खः ।

नेवाः लागाय् मुनाच्वंगु थ्व फोहोर याकनं समाधान यायेमाः धासें नेवाःतय्पाखें सरोकार क्यनेत संघर्ष समिति व जागरण मञ्चं मनपायात निगू हे अलग अलग ज्ञापनपत्र नं लःल्हाःगु दु। ज्ञापनपत्रय् फोहोरयात कयाः जुयाच्वंगु राजनीति तुरुन्त बन्द यायेमाःगु माग यानातःगु दुसा यदि फोहोर वाके मबिल धाःसा बल प्रयोग यानाः जूसां ल्याण्डफिल्ड साइटय् हे फोहोर वायेमाःगु माग यानातःगु दु। यदि उलि यानाः नं मजिल धाःसा येँया स्थानीय जनता वनाः नुवाकोटया सुं छम्ह हे मनूयात राजधानी दुमकायेगु ल्याखं जिल्लाया नाका हे बन्द याना बीगु ख्याच्वः नं उकी बियातःगु दु। ज्ञापनपत्र संघर्ष समितिपाखें नायः गजेन्द्र मानन्धर व मंचपाखें संयोजक सुजिव वज्राचार्यं लःल्हाःगु खः ।

थ्वहे झ्वलय् येँय् मुनाच्वंगु फोहोरया अस्थायी व्यवस्थापन यायेगु कथं मनपां थनिंनिसें येँया थीथी लागाय् मुनाच्वंगु फोहोर मुनेगु शुरु याःगु दु। थ्व फोहोर छुं न्हिया लागिं येँय् दुने हे व्यवस्थापन यायेत्यंगु खः। उखे सिसडोलवासीतलिसे थौं सुथय् ८ बजेनिसें मनपां वार्ता शुरु याःगु दु। वार्तापाखें थौं लिच्वः पिहां वइगु आशा यानातःगु दु ।