गौतमया राष्ट्र संघ उम्मेदवारी प्रभावित
येँ (सन्ध्या टाइम्स)/नेपालय् शान्ति प्रक्रिया ताःलाकेत वयाच्वंगु राष्ट्र संघीय मिशन अनमिनयात देय्या सत्तारुढ नेतातय्सं लाथेपाथे धायेगु यानाच्वंगु कारणं संयुक्त राष्ट्र संघया महासभाया अध्यक्ष जुइगु लागिं उम्मेदवारी बियाच्वंम्ह भाजु कुलचन्द्र गौतमया उम्मेदवारी नं प्रभावित जुइगु संकेत खने दया वःगु खँ सीदुगु दु ।
वय्कःया उम्मेदवारीयात बल्लाकेगु लागिं सरकारं वय्कःयात प्रधानमन्त्रीया सल्लाहकार नियुक्त याःगु खः। तर राष्ट्र संघया छगू महत्वपूर्ण पदय् उम्मेदवारी बियाच्वंम्ह मनूया सरकारं राष्ट्र संघयात हे लाक्वपाक्व धायेगु यानाहःगुलिं थुकिं अन्तर्राष्ट्रिय ख्यलय् बांलाःगु संकेत मवनीगु खँ धयाहःगु दु। सूत्रया कथं आः वय्कःया उम्मेदवारीयात समेत ध्यानय् तयाः सरकारं अनमिनया म्याद छुं ईया लागिं जक जूसां थपे याइगु सम्भावना ब्वलनाच्वंगु दु ।
