थौं बेपत्ता सम्वन्धी अन्तर्राष्ट्रिय दिवस

येँ (सन्ध्या टाइम्स)/बलपूर्वक बेपत्ता याइगु ज्याया विरुद्ध अन्तर्राष्ट्रिय दिवस थौं विश्वन्यंकं हना च्वंगु दु। निलाया दुने बेपत्ता यानातःपिं नेपाःया थ्यंमथ्यं द्वःछिम्ह मनूतय्त सार्वजनिक यायेगु धकाः याःगु सम्झौता थौं प्यदँ दतं नं सार्वजनिक याःगु मदुनि। थौं थीथी मानव अधिकारवादी, खलः पुचःतय्सं मंकाः कथं सनिलय् बसन्तपुली मैनमत च्याकाः सभा यासें थ्व दिवस हनेत्यंगु दु। शान्ति तथा पुनःनिर्माण मन्त्री रकम चेम्जोङं बेपत्ता यानातःपिं नागरिक व इमिगु परिवारप्रति सहानुभूति प्वंकादीगु दु। वय्कलं छगू सन्देश बिसें बेपत्ता याइगु ज्या गम्भीर मावन अधिकार विरुद्धया ज्या नापं मानवता विरुद्धया अपराधया रुपय् कयाः उज्वःगु अपराधयात निरुत्साहित यायेत नेपाल सरकार संवेदनशील दु धयादीगु दु ।