'कार्यक्षेत्र सिमित यानाः अनमिनया म्याद थप'
संविधानसभाय् प्रतिनिधित्व याइगु राजनीतिक दलतय्सं नेपाः स्थित राष्ट्र संघीय मिसन अनमिनया कार्यक्षेत्र सिमित यानाः लिप्पांगु पटकया निंतिं म्याद थप यायेमाःगु सुझाव ब्यूगु दु । आइतवाः प्रधानमन्त्री माधवकुमार नेपालं अनमिनया म्याद व कार्यदेशया बारे सुझाव कायेत ग्वसाःग्वयादीगु ज्याझ्वलय् नेपालं अनमिनया म्याद थप यायेगु वा मयायेगु बारे दलतय् सुझाव फ्वनादीगु खः ।
बैठकय् दुथ्याःगु दलया नेतातय्सं अनमिनया म्याद लिप्पांगु पटकया निंतिं थप यायेमाःगु तर वस्वयां न्ह्यः कार्यक्षेत्र पुनरावलोकन यायेमाःगु खँ धाःगु दु । नेतातय्सं अनमिनयात नेपाली सेनाया अनुमगन यायेगु ज्या पाखें मुक्ति यायेमाःगु बिचाः प्वंकूगु खः ।
एनेकपा (माओवादी) व मधेशी जनअधिकार फोरम अनुपस्थित जूगु बैठकय् प्रधानमन्त्री नेपालं अनमिनया ज्या प्रति असन्तुष्टि प्वंकादिसें अनमिनयात ब्यूगु न्यागू कार्यदेश मध्ये स्वंगू पूवनेधुंकूगुलिं हानं अनमिनया म्याद थप यानाच्वनेम्वाःगु बिचाः तयादीगु खः ।
