छुं नं कथंया राजतन्त्रया पक्षय् मदु : माओवादी
एकीकृत नेकपा (माओवादीं) थःगु पार्टी छुं नं कथंया राजतन्त्रया पक्षय् मदुगु खँ स्पष्ट याःगु दु । छुं ई न्ह्यः निसें माओवादी सांस्कृतिक राजतन्त्रया पक्षय् दुगु चर्चा जुयाच्वंगु इलय् आइतवाः च्वंगु माओवादी केन्द्रीय कमिटिया बैठकं उगु खँ स्पष्ट याःगु खः ।
म्हिग जूगु छगू ज्याझ्वःया दथुइ जक प्रधानमन्त्री माधवकुमार नेपालं माओवादी सांस्कृतिक व धार्मिक राजतन्त्रया पक्षय् दुगुलिं दलत दथुइ सहमति जुइमफुगु व माओवादीं थुकीया बारे स्पष्ट यायेमाःगु खँ धयादीगु खः ।
केन्द्रीय कमिटिया बैठकं देय्या सार्वभौमसत्ता व अखण्डताया निंतिं गणतन्त्रवादी व राष्ट्रवादी शक्तित नाप छप्पँ जुयाः माओवादी न्ह्याः वनेफुगु खँ नं स्पष्ट याःगु दु ।
अथेहे बैठकं नेपाः स्थित भारतीय राजदूतावासं कुटनीतिक मर्यादा व विश्वव्यापी प्रेस स्वतन्त्रतय् हस्तक्षेप याःगु धासें आपत्ति प्वंकूगु दु । नेपाःया प्यंगू स्वतन्त्र संचार संस्थातय्सं राजदूतावासं हस्तेक्षप याःगु धासें विरोध यानाच्वंगु इलय् माओवादीं नं थुगु पलाःया विरोध याःगु खः । नापं माओवादीं नेपाली संचार माध्यमयात भारतीय दूतावासं ब्यूगु द्वपंया बारे नेपाः सरकारया स्पष्ट धारणा नं माग याःगु दु ।
